زومرود

قوشلار اوچار قاناد چالار یورددان یوردا کئچرلر
بیزیم سئرچه دن دالینجا اووچو کمندینده دیر

کیشینین گوزلرینده کی سئوینج اوندان چوخ منی سئویندیریر. اوزون و جیریق بیر کت. اونون آلتیندا بوز بیر توخونما کوینک. یاشی بلکه 75 دیر بلکه ده یئتمیش بیلمیرم. آنجاق یاشاماق هوسی وار بو کیشینین.
اللرینین تیتره مه سی اونون شنگول و چاپ جانلی بیر قوجا اولدوغونو گیزله ده بیلمیر.
کیشی دن آیریلیب آیریلماز کیشی یوخ اولور. یئدی کئچل کوچه سینده کی حامام باغلی دی. تویوقچولار های کویله دوندوروجولو ماشینلاردان بئچارا تویوخلاری تام شدت له یئره آتیرلار.
بالیق قوخوسو، تویوق ایسی هاوانی بورویوب.
قارشی طرف ده سعادت مهمانخانا سینا گلن بیر نئچه باکی لی نی گورورم. باکی لی اولدوقلاری ائله گئیینیش لریندن بللی دیر.
کئچیرم . تربیت ده فردوسی کیتاب ساتیش توکانینین قارشیسیندا دایانیرام. بس سیروس قمری هانی. من حیدربابانی ایلک دونه سیروس قمری باسدیردیغی کیتابدان اوخویوب و لذت آپارمیشام.
توکانلار باغلی دی. تبریزین کاپیتالیست "بازاری"لری هله گلمه ییب لر. اونلار ایندی یوخودان دورمازلار. یالنیز بئلینه اون توپ پارچا توپلایان بیر اورتا یاشلی هامبال من گئدن سمتین عکسینه حرکت ائدیر. اوزونه باخیرام.
مشدی عبادین او هامبالینا اصلا اوخشامیر بیزیم هامبال. بیزیم بو هامبال هئیکلی و جانی سولو بیرینه اوخشاییردی. اللری بویوک یاناقلاری دیک، کوکسو آچیق بیریسی ایدی. یئریشیندن هئیبت نفسیندن کیشیلیک توکولوردو. "چوخلاری هامبال دا اولا بیلمز." بونو منه آتام دئمیشدی.
بویوک تربیتین قورتولاجاغینا یئتیشیرم.
خیاوان (میللی خیاوان - پهلوی خیاوانی - امام خیاوانی) سیز نه آدلاندیرساز اولار. ایندی چوخ خلوت دی. له له بیگ کوچه سینه گئریب سالانا سالانا ایش یئریمه ساری یولا دوشورم.
کوهنه دام داشلار، یئنی و عیبه جر تیکینتی لر تبریزی دئشیب. یاراسی قورتلامیش بیر جانلی کیمی تبریز گونو گوندن تبریزسیزله ییر.

کوک، توپراق ، بوداق
دال ، گونش ، داغ
کوکس ، بولود، دنیز.

21مارس2013

آفریقادا بیر مثل وار: آسلانلارین اوز تاریخ یازانلاری اولمادیغی زامانا قدر شیکار داستانلاری هر زامان اووچولارین ظفریندن دانیشاجاقلار.
یک مثل آفریقایی می گوید تا زمانی که شیرها تاریخ نویس های خود را نداشته باشند ، داستانهای شکار همواره شکارچی ها را پیروز نشان خواهد داد

24فئوریه2013

تبریزه یاغیش یاغیر. ایندی گرک قار یاغا نه یاغیش!
قیشدا یاغیش! یازدا گونش یای دا اود
سانکی وئریب دیر گونشه تانری خود

29ژانویه2013

خیشابدا مرمی لر دولو گلن گئدن گلن گئدن
گوزونده دهشتین یولو گلن گئدن گلن گئدن
قولوندا قونداغین ایزی الینده مرمی لر دیزی
یاغیر یئنه بو مرمی لر گلن گئدن گلن گئدن

21 ژانویه2013

16اکتبر2012

غم الینده ناچار قالما

16 آگوست 2012

بو ندن لر هردن او قدر ساده اولور کی اونلار گورمک ده بئله چتین لیک چکیریک. یازی بلکه ایسنان آیناسی دیر گوردوکلری و دویدوقلارینین قارشیسیندا و اونا یعنی او گوزگویه یانسیان لاری عکس ائتدیرمک و یا عکس ائتدیرمه مک اوزو بیر مسئله دیر.

یعنی بو بیر سئحیرلی گوزگودور. نه فیزیک قایدا قانونلاری اونو چرچیوه یه سالیر نه باشقا بیر شئی. بو گوزگو، یازان اینسانین اوره یینین ایلک چیرپینیشیندان نئجه تاثیرلر آلتیندا قالیب نه تجربه لر ائتدییندن آسیلی اولاراق شکیللنیر.